Waziri wa Vijana na Michezo Dkt. Ashraf Sobhy, amkaribisha mwakilishi mpya wa Shirika la UNICEF nchini Misri na akisisitiza uendelevu wa ushirikiano kati yao ili wasaidie vijana

Waziri wa Vijana na Michezo, Dkt. Ashraf Sobhy, amkaribisha Bi. Natalia Winder Rossi, Mwakilishi Mpya wa Shirika la Umoja wa Mataifa la UNICEF nchini Misri, ambaye alianza kazi rasmi mwezi wa Februari mwaka huu, ili kujadili njia za kuimarisha ushirikiano kati ya Wizara na Shirika hilo katika utekelezaji wa mipango ya maendeleo inayolenga vijana.

Mkutano huo ulijadili mada kadhaa za maslahi ya pamoja, ikiwa ni pamoja na mipango ya vijana inayotekelezwa na UNICEF kwa ushirikiano na Wizara. Ilisisitizwa umuhimu wa kuhakikisha uwazi katika utekelezaji wa mipango hiyo, na kusisitiza kuwa mashirika ya Umoja wa Mataifa hufanya kazi kwa kuzingatia vipaumbele na mipango ya serikali za kitaifa katika mfumo wa makubaliano ya ushirikiano wa kimkakati.

Pia, mkutano huo uligusia changamoto zinazokabili mipango fulani ya vijana, huku Wizara ya Vijana na Michezo ikiwa imejitolea kuhakikisha kuendelea kwa miradi ya maendeleo na kuimarisha athari yake kwa vikundi vilivyolengwa.

Wakati wa mkutano, mipango mikuu ya pamoja kati ya Wizara na UNICEF ilionyeshwa, ikiwa ni pamoja na mpango wa "Genius Academy - Vijana wa Nchi," ambao ni mradi wa kimkakati wa kuboresha vituo vya vijana na kuunda mipango mipya inayolingana na mahitaji ya soko la kazi na kazi za baadaye. Pia, iligusiwa mafanikio ya "Kamati ya Kitaifa ya Vijana na Tabia Nchi," ambayo kwa sasa inafanyiwa kazi ili kuibadilisha kuwa taasisi endelevu.

Zaidi ya hayo, ilijadiliwa uboreshaji wa "Mpango wa Maendeleo ya Ujuzi wa Shughuli Zangu," ambao ni moja wapo ya mipango ya zamani zaidi ya pamoja kati ya Wizara na UNICEF, ili kuhakikisha kuwa inakabiliana na mabadiliko ya kisasa. Pia, ilionyeshwa "Mpango wa Mimi ni Mtu wa Kujitolea," unaolenga kuimarisha utamaduni wa kujitolea kati ya vijana, pamoja na "Mpango wa Michezo kwa Maendeleo na Mpango wa Jamii," ambao ni moja wapo ya mipango inayotarajiwa kuongeza athari ya kijamii ya michezo.

Dkt. Ashraf Sobhy alimkaribisha Bi. Natalia Winder Rossi, akimtakia mafanikio katika kazi yake mpya, na kusisitiza juhudi za Wizara ya kuimarisha ushirikiano na UNICEF ili kusaidia vijana wa Misri na kutoa mazingira yanayowawezesha kufikia malengo yao.

Alisema kuwa Wizara ya Vijana na Michezo inaipa kipaumbele maalum ushirikiano wa kimataifa ambao unasaidia kuwawezesha vijana na kuwaendeleza, akisisitiza umuhimu wa kutumia ujuzi na rasilimali zinazotolewa na mashirika ya kimataifa ili kusaidia miradi ya maendeleo, haswa katika nyanja za uwezeshaji wa kiuchumi, mafunzo na ujasiriamali.

Aliongeza kuwa ushirikiano na UNICEF unaonyesha juhudi za Wizara ya kuendeleza mipango kamili inayokidhi mahitaji ya vijana, na kwamba Wizara itaendelea kufanya kazi ili kuimarisha ushiriki wa vijana katika maendeleo endelevu kupitia mipango bora inayosaidia uwezo wao na kupanua upeo wao.

Mwisho wa mkutano, ilisisitizwa fursa za ushirikiano wa baadaye, ambapo Waziri alitaja uongozi wa pamoja wa Wizara ya Vijana na Michezo wa kikundi cha matokeo ya "Kuwawezesha Wasichana na Wanawake kwa mwaka 2025," ambayo inakuja chini ya makubaliano ya pamoja kati ya Misri na Umoja wa Mataifa, akieleza kuwa Wizara inafanya kazi pamoja na UNICEF kuunda mipango mipya ya kusaidia wanawake na kuwawezesha ndani ya mpango wa kimkakati wa mwaka huu.